ՀԱՅՈՑ ՑԵՂԱՍՊԱՆՈՒԹՅԱՆ 100-ՐԴ ՏԱՐԵԼԻՑԻՆ ՆՎԻՐՎԱԾ «ՄԻԼԻՈՆԱՎՈՐ ԿՅԱՆՔԵՐ» ՏԵՍԱՀՈԼՈՎԱԿԻ ՊՐԵՄԻԵՐԱ
Ապրիլի 18, 2015
Միջոցառումների կազմակերպման ոլորտում մասնագիտացված «Ուրբան Իվենթս» ընկերությունն իրականացրել է Հայոց ցեղասպանության 100-րդ տարելիցին նվիրված «Միլիոնավոր կյանքեր» (“Millions of Lives”) տեսահոլովակի պրեմիերայի կազմակերպչական բոլոր աշխատանքները։
«Ուրբան Իվենթս»-ը «Միլիոնավոր կյանքեր» ծրագրի հետ համագործակցության շրջանակում իրագործել է պրեմիերայի պաստառների և հրավիրատոմսերի դիզայնի մշակումը, հրավիրատոմսերի տարածումը, կազմակերպել տեսահոլովակի պրեմիերայի հյուրերի հյուրասիրությունը։ Բացի այդ, «Ուրբան Իվենթս»-ն իրականացրել է պրեմիերայի տեղեկատվական ապահովումը և ԶԼՄ-ներում լուսաբանման հետ կապված կազմակերպչական աշխատանքները՝ պատրաստելով և տարածելով «Միլիոնավոր կյանքեր» տեսահոլովակի պրեմիերայի և այդ իրադարձությանը նվիրված ասուլիսի մամուլի հաղորդագրությունները։
Պրեմիերային մասնակցել են ՀՀ օրենսդիր և գործադիր իշխանությունների, դիվանագիտական առաքելությունների, մշակութային, քաղաքական, գործարար շրջանակների, հասարակական կազմակերպությունների ներկայացուցիչներ, լրագրողներ, հյուրեր, «Միլիոնավոր կյանքեր» տեսահոլովակի ստեղծագործական թիմը և մասնակիցները։
«Միլիոնավոր կյանքեր» տեսահոլովակում նկարահանվել են համաշխարհային մշակույթի գործիչներ Շարլ Ազնավուրը, Մոնսերրատ Կաբալյեն, Պատրիկ Ֆիորին, Մարիամ Մերաբովան, Ալեն Թերզյանը, Սեբու Սիմոնյանը, Արմեն Ջիգարխանյանը, Վլադիմիր Սպիվակովը, Կոկո Յորքը, Իշտար Ալաբինան, Տիգրան Պետրոսյանը, Զառան, Միխայիլ Գալուստյանը, Գարիկ Մարտիրոսյանը, Դմիտրի Խառատյանը, Էռնա Յուզբաշյանը, Անդրեյ Դավիդյանը և ուրիշներ:
Երգի բառերը գրել է բանաստեղծ Ռիդա Մեյը, իսկ երաժշտության հեղինակն է կոմպոզիտոր և պրոդյուսեր Կարեն Մարգարյանը: Տեսահոլովակի ռեժիսորներն են Միհրան Ստեփանյանը, Հայկ Ատոմցը, Օլեգ Մովչանը, Նատալիա Իվանովան և Օլեգ Տարավկովը:
Երգը մի փոքրիկ աղջկա խեղված ճակատագրի մասին է, ով կորցրեց իր ընտանիքը և օթևանը` այս մեծ աշխարհում մնալով միայնակ՝ անապատում անհետացած երազների հետ։